CЕМЕЙСКИЕ - СТАРОВЕРЫ ЗАБАЙКАЛЬЯ

Новости История Современность Правила Храм Библиотека Молитвослов Календарь Ответы Наука Энциклопедия Паломник ЛицаОбщинаКостюмСсылкиГостевая

Молитвослов

 

Канон священномученику и исповеднику протопопу Аввакуму

 

О молитве в деле спасения

 

Канон священномученику Афанасию, епископу Иркутско-Амурскому

 

Канон святителю Амвросию, митрополиту Белокриницкому

 

Канон святителю Иосифу, епископу Дальневосточному

 

Краткое объяснение церковного богослужения

 

О молитве

 

Двуперстное крестное знамение

 

О церковно-славянском языке

 

Молитвы



Канон священномученику Афанасию, епископу Иркутско-Амурскому


18-го апреля - день памяти священномученика Афанасия, епископа Иркутско-Амурского, причисленного к лику святых осенью 2003 года, его житие можно прочитать в "Библиотеке".


ТРОПАРЬ (Глас 2). Доброта епископом и страдальцем блаженне, овцы словесныя созвал еси, богоборных сокруши многоплетенныя сети, и в бури безбожия потопляемым звезда путеводная быв, святителю и мучениче Афанасие, моли Христа Бога спастися душам нашим.
СЛАВА, И НЫНЕ. БОГОРОДИЧЕН (Глас той же). Вся паче смысла, вся преславная Твоя Богородице таинства, чистотою запечатлена, и девством хранима, Мати разумеся неложна, Бога рождьши Истиннаго. Того моли спастися душам нашим.

КАНОН (Глас 2)


ПЕСНЬ 1. ИРМОС. Поем Господеви, в мори древле люди наставльшему, и в нем фараона с вои потопльшу, песнь победную, яко прославися.
ЗАПЕВ: Святыи священномучениче Афанасие, моли Бога о нас.
Соверши Христе словеса моя, во свете разума святаго Евангелия Твоего, да воспою благочестно, славнаго Афанасия божественную память.
ЗАПЕВ. Восприим зарю духовную и мужески подвизася, яко апостоли стяжав страдание, взятся к высоте небесней, и ныне со ангелы радуешися.
СЛАВА. Да почтется днесь архиерей верныи, пастырь доблии, столп церковныи, великая и многосветлая звезда, священномученик Афанасий, верным утвержение.
И НЫНЕ. Душу мою озари омраченную прегрешеньми, и ослепленную лютыми похотеньми, яже Солнце Праведное рождьшая, Приснодево. Елико бо хощеши можеши.
КАТАВАСИЯ: Избави от бед рабы своя, святыи священномучениче Афанасие, яко вси по Бозе к тебе прибегаем, ты бо молиши о нас Христа Бога нашего.
Господи помилуй (трижды).


ПЕСНЬ 3. ИРМОС. На камени мя веры утверди, разшири уста моя на враги моя, возвесели бо ся дух мой воспевати, несть свята якоже Бог наш, и несть праведна паче Тебе Господи.
ЗАПЕВ. Стрелою терпения твоего устрелил еси Господня враги, и мечем крепости ссече бесовская воиньства, мужески победныи венец Афанасие восприял еси блаженне.
ЗАПЕВ. От юности освящен быв, блаженне, храм Христов себе самого соделал еси, из тмы неверия люди извел еси, Трисоставному Господу вопияше: слава Тебе Человеколюбче.
СЛАВА. Глагол твоих мечем вражию лесть разорил еси, кровным же течением сердца напоил еси, верою чтущих святую память твою, мучениче славне.
И НЫНЕ. Избави нас от искушении, и бури помышлении Пречистая, от всякаго гнева, всякаго греха, глада же и губительства, и вечнаго Дево мучения.
КАТАВАСИЯ.


СЕДАЛЕН (Глас 3). На заколении сподобися желаемаго конца, и быв наречен Афанасие предстатель Христови десныи, и собеседник святым ангелом, и славе Господней наследник, и молитвенник о хвалящих тя.
СЛАВА И НЫНЕ. Кождо идеже спасается, в правду тамо прибегает. И кое ино таково прибежище, яко Твое Богородице, покрывающее душа наша.


ПЕСНЬ 4. ИРМОС. Услышах Господи слух Твоего смотрения, и прославих Тя Едине Человеколюбче.
ЗАПЕВ. Окроплен мучениче невинных кровей твоих пролитием, весь светел бысть, и ко Христу прейде богоявленно, яко разумное овча.
ЗАПЕВ. Ангельски на небеси ликовствуя, светом неизреченным озаряемь Божества, яко имыи дерзновение, за ны помолися, даровати нам исцеление и оставление грехов.
СЛАВА. Яко крин сельный процвел еси праведниче, во дворех Бога нашего, и яко кедр умножился еси, и яко маслина явился еси, маслом дел твоих всех умащая лица верою чтущих тя.
И НЫНЕ. Мати Приснодево, яко чистую Тя Слово Божие возлюби, в Тебе воплощься обнови всякаго человека, Темже Своего угодника прослави.
КАТАВАСИЯ.


ПЕСНЬ 5. ИРМОС. Света Подателю, и веком Творче Господи, во свете Твоих повелений настави нас, разве бо Тебе иного Бога не знаем.
ЗАПЕВ. Яко агнец без порока и дар многосовершен сам себе принесе Творцу, страдав и прелесть безбожную победив, мучеником удобрение.
ЗАПЕВ. Ныне река божественных и честных ти кровей, реки безбожия иссушила есть святителю, верных же сердца напоила есть.
СЛАВА. Яко оружием непобедимым, крестом Христовым огражадаемь святе Афанасие, силу сопротивнаго победил еси, и до конца сего без вести сотвори.
И НЫНЕ. Иже волею вся Соделавыи, во чрево неискусобрачное изволи вселитися. Иже тлением болевшее естество наше, нетлением обогатил есть, яко Милосерд.
КАТАВАСИЯ.


ПЕСНЬ 6. ИРМОС. Бездна грехов обыде мя последняя. Но якоже пророка Иону, Господи, Господи возведи от тли живот мой.
ЗАПЕВ. Своему отечествию святе Афанасие яко солнце возсия. Тем твою светоносную и честную празднующе память, всякия скорби избавляемся.
ЗАПЕВ. Исусу Сладкому принося священныя жертвы, сам себе жертву Владыце принесе. Того моли возвести от тли живот наш.
СЛАВА. Явися блаженне удобрение мучеником, апостолом сопрестольник, святитель святых и ангелом сослужебник, житию тех уподобися.
И НЫНЕ. Твое Божественное Рожество Пречистая обнови нас, и чада показа и сыны Дневи и Свету. И спасшеся взываем, радуися Невесто Неневестная.
КАТАВАСИЯ.


КОНДАК (Глас 4). Иже безсмертию тезоименитаго святителя, и православию наставника, истиннаго мученика, светильника сибирския земли, восхвалим сице взывающе: от бед избави ны, присно твоими мольбами, отче наш, Афанасие.
ИКОС. Море Байкальское восплещи волнами, горы взыграйтеся яко овни, и холми яко агньцы овчии, созывающе вся верныя божественне возвеселитися сице поюща: радуися, мучеником украшение. Радуися, святителем лепото. Радуися, благочестия прозябение честно. Радуися, похвало отечеству своему. Радуися, Царствию небесному причастниче. Радуися, святе Афанасие, пастырю добрыи, душу свою положивыи за овцы своя.


ПЕСНЬ 7. ИРМОС. Купина в горе огнем палящи, и обросима пещь халдейская, яве прописа Тя Богоневестная: Божественныи бо безплотный в плотне чреве Огнь неопально прият. Тем из Тебе Рождьшагося поем, благословен Бог отец наших.
ЗАПЕВ. Светодавцу Христу принесл еси блаженне, веру нескверну, надежу непостыдну и любовь нелицемерну, всех созывая пети: благословен Бог отец наших.
ЗАПЕВ. Лесть безбожную попрал еси, и антихристово нечестие, богоборцев суемудрие посрамил еси, отче Афанасие вся научая Господеви пети: благословен Бог отец наших.
СЛАВА. Авель новыи, пастырь овцам бысть святителю, убиение от новаго Каина терпя, взываше: благословен Бог отец наших.
И НЫНЕ. Рожество Твое древле пещь проображаше, Всенепорочная, отроки бо не опали, яко же утробу Твою Огнь Божественный, Ему же поем, благословен Бог отец наших.
КАТАВАСИЯ.


ПЕСНЬ 8. ИРМОС. О подобии злате не брегоша преславнии отроцы, не изменныи живыи Божии образ видевше, среди пламени пояху: осущественная, пой Господа вся тварь, и превозношай Его во веки.
ЗАПЕВ. Всесветлу звезду тя показа Христос на высоте церковней мучениче, воистину во страданиях светящуся, вселенную всю озаряюща взывая: Господа вся дела пойте, и превозносите Его во веки.
ЗАПЕВ. Изволил еси паче живота умрети, мучения венец любя прияти, его же нося в вышнем царствии Афанасие ликуеши, воспевая: Господа вся дела пойте, и превозносите Его во веки.
СЛАВА. Миром помазан божественным священнодетелю, пролитием ти крове, всех пети научая: Господа вся дела пойте, и превозносите Его во веки.
И НЫНЕ. Иже древле в огненней пещи, юноши прообразиша Твою неопалимую утробу, огнем Божества прохлаждаеми. Его же приимши породи Бога Слова поющим: Господа вся дела пойте, и превозносите Его во веки.
КАТАВАСИЯ.


ПЕСНЬ 9. ИРМОС. Яже прежде солнца светилника Бога возсиявша, плотию к нам пришедша, из боку девичю неизреченно вочеловечьшася, Благословеная Чистая, Тя Богородице величаем.
ЗАПЕВ. Видети славу Вседержителя желая, обновил еси души крепость, и славою обогатися небесною. И ныне со дерзновением предстоя Христови, молися о стаде своем, отче наш.
ЗАПЕВ. Сретоша тебе Афанасие, чини ангельстии и праведных собори возвеселишася. И от вседержительныя десницы владычни венчася, тем тя достойно величаем.
СЛАВА. Исповедниче и мучениче святе Афанасие, крепкии каменю веры, Духу Святому сосуде избранныи, не премолчи вопия за ны ко Господу.
И НЫНЕ. Исполнение благих Своима рукама носящи Богоневестная, исполни мольбы раб Своих, и к Богу шествия наша исправи, в добродетелех жити нас укрепляющи.
КАТАВАСИЯ.


ЕВАНГЕЛЬСКАЯ СТИХЕРА (Глас 6). Волею принесеся Господеви своему, яко всесожжение живо и одушевленно, и жертва благоприятна и пречестна. Тем же буди молитвенник тепл, бури изымая стадо твое, верою призывающих и поющих тя, святителю Афанасие.

 

e-mail автору проекта