Полки для икон Купить икону
CЕМЕЙСКИЕ - СТАРОВЕРЫ ЗАБАЙКАЛЬЯ

Новости История Современность Правила Храм Библиотека Молитвослов Календарь Ответы Наука Энциклопедия Паломник ЛицаОбщинаКостюмСсылкиГостевая

Молитвослов

 

Канон священномученику и исповеднику протопопу Аввакуму

 

О молитве в деле спасения

 

Канон священномученику Афанасию, епископу Иркутско-Амурскому

 

Канон святителю Амвросию, митрополиту Белокриницкому

 

Канон святителю Иосифу, епископу Дальневосточному

 

Краткое объяснение церковного богослужения

 

О молитве

 

Двуперстное крестное знамение

 

О церковно-славянском языке

 

Молитвы



КАНОН СВЯЩЕННОМУЧЕНИКУ И ИСПОВЕДНИКУ ПРОТОПОПУ АВВАКУМУ

 

 

 

Тропарь, глас 6. Яко апостолом подобниче, и священником наставниче, и яко путеводителю заблуждьшим и пастырю добрый, положивый душу свою о спасении словесных овец Христовых, молися о нас единому Человеколюбцу Богу (Дважды).

 

Слава, и ныне. Богородичен. Иже благословенную нарекии Матерь Себе, прииде на страсть волею Своею, возсияв на Кресте, взыскати хотя Адама, глаголя ангелом, срадуйтемися, яко обретеся изгибшая драхма, Иже вся мудре устроивый, Господи, слава Тебе.

Канон, глас 5.

Егоже краегранесие: Аввакума славьте вернии вси.

 

Песнь 1, ирмос. Коня и всадники в мори Чермнем сокрушаяй брани мышцею высокою Христос истрясл есть, Израиля же спасе, победную песнь поюща.

Запев: Святый священномучениче и исповедниче Аввакуме, моли Бога о нас (поклон).

Аввакума великаго страстотерпца, труды и подвиги како возмогу воспети недостойный аз, но дерзаю на сие, надеяся, Христе, на Твою всесильную помощь.

Запев. Веселятся небеса, и радуется земля в память исповедника Господня, победившаго противныя безмерною любовию к Богу, и мучением ради славы Его.

Слава. Возлюбил еси измладаХриста Бога, Его же заповеди соблюдая, спасл еси дщерь вдовицы от насильства болярина, не щадя живота своего, Аввакуме благодерзновенне.

И ныне. Сын Божий Сын человеческий бысть Тобою Пресвятая, да нас, сынов человеческих, сотворит сыны Божия по благодати, тем же Тя с любовию славословим.

 

Катавасия: Избави от бед рабы своя, святый священномучениче и исповедниче Аввакуме, яко вси по Бозе к тебе прибегаем, ты бо молиши о нас Христа Бога нашего. Господи помилуй (трижды, с поклонами).

 

Песнь 3, ирмос. Утвержей ни на чем же землю повелением Си, и распространи неодержимую тяготу, на недвижимом Христе камени заповедей Ти, Церковь Свою утверди, едине Блаже и Человеколюбче.

Запев. Агньцу Божию, вземлющему грехи мира подобяся, яко агнец в жертву принесеся, святе, жив сожжен от злочестивых веры ради и любве християнския.

Запев. Кая темница не име тебе юзника, кая ли область не име тебе благовестника, от запада бо до востока, и от востока до запада прехождаше, утвержая верных.

Слава. Ум огненный имея, священномучениче, попалил еси терние ересей учении православными, и чудесы преславными, и житием воистину богоугодным.

И ныне. В чуждую египетскую страну избегшая с предвечным Младенцем от Ирода, Богородице, сохрани избегших от злых гонителей, покрывая их покровом милости Своея.

 

Катавасия.

 

Седален, глас 2. Мучениче добропобедне, Аввакуме премудре, обличивый козни сопостата, ясно исповедавый Троицу нераздельную, от напастей нас избави.

Слава, и ныне. Богородичен. Божественное пресечение, еже семя жены сотрет главу змия, исполнися на Тебе Приснодево, воплотивыйся бо от Тебе без мужескаго семени, Христос сотре главу злоначальнаго змия, и спасе род человеческий от прародительнаго греха.

 

Песнь 4, ирмос. Божественное твое разумев смотрение, дивяся Аввакум, Христе, трепетно вопияше Ти на спасение людем Си, спасти благия Своя пришел еси.

Запев. Мысль свою вперив к Богу, и очистив душу от тины греховныя, явился еси сосуд благодати Божия, священномучениче, молися, да не явимся сосуды гнева Божия.

Запев. Аще и предаша тя еретицы озлоблениям лютым, но не поколебаша духа твоего силу, Духа бо Святаго исполнен был еси обильно.

Слава. Славит тя вся русская страна, и вернии тобою укрепляются, Церковь же Божия веселится, Аввакуме, прославляя твоя страдания безчисленная.

И ныне. Чудо дивное,яко носяй всю тварь рукою Своею, рукама Девыя носим явися яко Младенец, да спасет человека, младенствующа грехом.

 

Катавасия.

 

Песнь 5, ирмос. Одеяйся светом, яко ризою, к Тебе утренюю и Тебе вопию, душу мою просвети омрачную, Христе, яко Милосерд.

Запев. Люди и скоты исцеляше и бесы прогоняше, чудеса многа сотворяя в славу Христа Бога нашего яко служитель Его и угодник великий.

Запев. Апостольскими труды и подвиги украсился еси, и язык богогласен стяжал еси, священномучениче Аввакуме, благочестия светом просвещаше люди.

Слава. Витийства суемудренных посрамил простотою словес, чудесы божественными и молитвою богоприятною, еюже и ныне сохрани нас от всех искушений.

И ныне. Вся яже на Тебе бывшая таинства непостижима суть, прежде бо Рожества Дева, и в Рожестве Дева, и по Рожестве паки Девою пребываеши, Мати Христа Бога.

 

Катавасия.

 

Песнь 6, ирмос. Волнящееся бурею душетленною, Владыко Христе, страстей моих море укроти и из тли возведи мя, яко Милосерд.

Запев. И восток дальний, и север хладный, и вся русская страна освятишася стопами ног твоих, обтекл бо еси апостольски землю, просвещая люди светом Евангелия.

Запев. Тя славят святители со иереи, и весь собор благочестивых, в животе бо сиял еси чудесы предивными, и ныне не оставляеши нас своею помощию.

Слава. Евангельскою простотою и святостию крепко оградився, Аввакуме, и на нечестие ополчився, крепость ересей низверг, твердый проповедник явися.

И ныне. Ходатаицу приводим Ти Матерь Твою, Христе,воззри милостивым Си оком на достояние Свое, и сохрани нас от страха и бедствий грядущих на вселенную.

 

Катавасия.

Слава, и ныне.

Кондак, глас 2. Богодухновеннаго исповедника Аввакума, претерпевшаго муки лютыя, и жива сожженнаго,приял еси Господи, яко жертву непорочну, Един Сый прославляяй святых Своих.

Икос. Озари омрачение ума моего Христе, яко да дерзновенно отверзу уста воспети труды и страдания священномученика Твоего, егоже подвигом и терпению удивишася видимая же с невидимыми, защищаше бo обидимых от руки обидящих, не бояся лица сильных, и искореняше языческия обычаи и кощуны, обличаше ереси и утвержаше Православие, и претерпев узы, темницы, биения, раны, глад, имраз, и смерть во пламени огненнем, и прославил еси его по всей земли, Един Сый прославляяй святых Своих.

 

Прокимен. Честна пред Господем смерть преподобных Его.

Стих. Что воздам Господеви о всех, их же воздаст ми.

Евангелие от Матфея, зач. 36. Рече Господь Своим учеником, се Аз посылаю вас, яко овца посреде волков. Будите убо мудри яко змия, и цели яко голубие. Внемлете же от человек, предадят вы на сонмы, и на соборищах их биют вас. И пред владыки же и цари ведени будете Мене ради, во свидетельство им, и языком. Егда же предают вы, не пецытеся како или что возглаголете. Дастбося вам в той час, что возглаголете. Не вы бо будете глаголющии, но Дух Отца вашего глаголяи в вас. Предаст же брат брата на смерть, и отец чадо. И востанут чада на родителя, и убиют их. И будете ненавидими всеми, имене Моего ради. Претерпевыи же до конца, той спасен будет.

Стихера, глас 6. Благочестия истиннаго проповедник, сожженный во пламени огненнем, водрузися на тверди церковней, яко звезда светосиятельная, и освещаеши темную нощь неверия, и озаряеши сердца верных учении божественными, и предивными чудотворении, священномучениче достохвальне, молитвенниче о душах наших.

 

Песнь 7, ирмос. Превозносимый отцем Господь, пламень угасив, дети же прохладил есть единогласна поюща: Боже, благословен еси.

Запев. В стране сибирстей многодетно странствуя в полку воеводы свирепаго, терпел еси глад и мраз и истязания многая за правду божественную, поя: Боже, благословен еси.

Запев. Еретическая ополчения и козни бесовския сокрушил еси силою крестною и мученическими подвиги, и явися необоримая крепость Церкви Христовы.

Слава. Ревностию и любовию Божиею подвизаем, обличаше злодейства боляр и воевод, защищая неповинных, яко обидимым заступник и нищим помощник.

И ныне. Да посрамятся неисповедующии Тя истинную Богородицу, и да веселятся вси вернии, имуще Тя Молитвенницу неусыпную ко Христу Богу.

 

Катавасия.

 

Песнь 8, ирмос. Тебе, Вседетелю, в пещи отроцы всемирный лик составльше, пояху: дела всякая Господа пойте и превозносите Его вовеки.

Запев. На судище неправеднем дерзновенно защищаше предания апостолъския, еже не терпяще отступницы изгнаша тя в заточение, и во огни сожгоша.

Запев. И Даурская страна, и град стольный Москва, и сибирская тайга, и поволжския веси, и области моря студенаго имяху тя пастыря и учителя, и наставника на путь спасения.

Слава. Изволил еси приметатися в Церкви Божии, неже сообщатися со отступники, иже ссылаху тя и на восток и на север, жестоце истязующе, исповедниче Аввакуме.

И ныне. Умоли Сына Своего Христа Бога нашего просветити одержимых тмою неверия, утвердити Православие и спасти душа наша.

 

Катавасия.

 

Песнь 9, ирмос. Исайе, ликуй, Девая бо име во чреве, и породи Сына Еммануила, Бога же и Человека, Восток имя Ему, Его же величающе, Тебе, Дево, ублажаем.

Запев (поклон). Волю Божию исполняя присно, псаломски глаголал еси правду и пред цари небоязненно, яко иерей истинный, того ради жива сожгоша тя.

Запев. Святую Троицу единосущную, исповедал еси ясно, яко словесы, тако и писании, Ейже покланяющеся, тя священномучениче ублажаем.

Слава. Истнил еси яко исполин еретическая ополчения, и попрал еси козни вражия ногама трудов и подвиг мученических, и молишися о всех тя верно ублажающих.

И ныне. Предстательнице теплая, ходатаице неусыпная, Богородице милосердая, молися о нас Господеви со святым исповедником Аввакумом, его же славя песнь скончаваю.

Катавасия.

 

Катавасия.

 

Задостойник: Владычице, приими молитву раб Своих (поклон до земли).

Трисвятое. И по Отче наш: Исусова молитва. Тропарь священномученику (Яко апостолом...), Слава, кондак ему (Богодухновеннаго исповедника...), и ныне, Богородичен (Иже благословенную...). Господи помилуй (40 раз, с тремя поклонами в начале). Слава, и ныне. Честнейшую херувим... (поклон). Слава (поклон), и ныне (поклон). Господи помилуй (дважды), Господи благослови (поклон).

 

Отпуст. Господи Исусе Христе, Сыне Божии, молитв ради Пречистыя Ти Матере и святаго священномученика и исповедника Аввакума и всех святых, помилуй и спаси нас, яко благ и Человеколюбец. Аминь.

 

Господи помилуй (трижды), и исходные поклоны.

 

 

 

 

 

e-mail автору проекта

  Rambler's Top100 Каталог Православное Христианство.Ру